قســــــــــــم كيميــــــــــــاء

قســــــــــــم كيميــــــــــــاء



السلام عليكم يا طلبة قسم الهندسة الكيميائية الجدد

الطبيعى انكوا مش عارفين معلومات عن قسم كيميا و كل ما حد من اصحابكوا يسمع قسم كيميا يقول و يقول لغايت لما يحوله لمعهد سنتين

كيميا هو القسم المستخبى اللى فى الكلية و اللى مبيتقالش عليه غير انه قسم الفشلة و اللى شايلين مواد و انه قسم هايف
مع كامل تقديرى و احترامى لكل اللى قال كدة بس انا بقولهم انه مش من الصح انك تحكم على حاجة متعرفهاش

واحدة واحدة فى الموضوع ده ان شاء الله هتقولوا كيميا و بس و ده هيكون بنقط واضحة .. تعالوا معايا نشوف كدة



ايه الفرق بين المهندس الكيميائى او المهندس الكيماوى و الكيميائى خريج كلية علوم ؟

السؤال المشهور اللى مبيسبش حد عايز يدخل كيميا و ييجى شوشو يوشوشه و يقوله يعنى انت ذاكرت و تعبت علشان تدخل هندسة و فى الاخر عايز تتساوى بخريج علوم
مثال صغير : الكيميائى عنده مادة الف و اضاف اليها مادة اخرى باء فنتجت مادى ثالثة مقدارها جيم ولكن مدة التفاعل اخذت 24 ساعة و بمقدار واحد جرام . طيب لو احنا عيزين نبنى مصنع لانتاج مادة جيم ولكن مليون جرام فى اليوم فهنعمل ايه .. هل هنجيب مليون كيميائى و كل واحد يعمل التفاعل بتاعه و فى اخر اليوم نلم الجرامات من كل واحد ؟ هتكون صعبه هه
يجى بقة المهندس الكيميائى علشان يرسم دورة انتاجية للمصنع بكل شئ فيه علشان فى الاخر يوصل لطريقة ابسط و ارخص و تؤدى للغرض
المهندس الكيميائى بيدرس كيميا علشان لما ياخد المعادلة من الكيميائى و قبل ميصمم يكون عارف اذا كانت صح او غلط بحيث ظروف التفاعل من الضغط و درجة الحرارة
فى نقطة كمان انه فى مكان العمل فالكيميائى بيشتغل فى المعمل



هل يتطلب سوق العمل المهندس الكيميائى ؟

المهندس الكيميائى يشتغل فى اى مصنع مهما كان علشان مفيش مصنخ يخلو من الدورة الانتاجية
ولو جينا نشوف قسم الهندسة الكيميائية موجود فى كام جامعة فى مصر فهنلاقيه موجود فى خمس جامعات
جامعة القاهرة وجامعة الاسكندرية و جامعة المنيا و العاشر من رمضان و الشروق
تعالو نقول اننا مش هنحط فى الاعتبار اخر ثلاث جامعات بجانب القاهرة و الاسكندرية و طبعا جامعة القاهرة اكبر فى عدد الدفعة و زى مانتوا عارفين ففى عدد بنات اكبر من عدد الولاد و معظم البنات اللى فيه مش عايزين يشتغلوا فبالتالى فرصة العمل كبيرة جدا لما فى السنة بيتخرج من القاهرة حوالى 150 طالب .
انا من السويس و عندى طريق السخنة فى على الاقل خمس مصانع بيتبنوا جديد و فى بور سعيد و فى دمياط و معظم المصانع دى بتروكيماويات و المفروض انكوا عارفين ان العالم كله يتجه فى الوقت الحالى و فى المستقبل الى البتروكيماويات
لو حد سئل فى اى مصنع على عدد المهندسين الكيميائين فهيلاقيهم الاكبر فى العدد و لو المصنع مش لاقى مهندس كيميائى فبيضطر للموافقة على خريج كلية علوم
حتى فى عملية استخراج البترول فتلاقو ان مهندسين البترول اقل من الكيميا



هل قسم الهندسة الكيميائية سهل ام صعب ؟

احب اقولكوا انه مفيش قسم فى الكلية سهل او صعب علشان كا قسم فيه السهل و الصعب و عملية السهل و الصعب دى عملية نسبية حسب كل طالب ففى فى كيميا اللى بيذاكر و يجيب امتياز و فى اللى مبيذاكرش و يعيد السنة



هل للبنات مجال فى العمل من خلال هذا القسم ؟

قسم كيميا من اكتر الاقسام اللى بتدى فرص عمل كبيرة للمهندسات و ده بيكون عن طريق مكاتب التصميم و رسم المصانع فالمهندسات تعمل على برنامج التصميم .. هتتفاجئوا لو قلتلكوا ان البرنامج ده تمنه 50 الف يورو



ماذا عن العمل الحر ؟

المهندس الكيميائى يقدر يعمل مصنع صغير على قده كعمل حر و المصنع الصغير اساسه ماكينة واحدة و فى مساحة صغيرة كانتاج البلاط او السيراميك او انواع من مواد الطلاء او اسمدة عضوية من القمامة
و فى فعلا اللى عمل كدة يعنى ده مش من فراغ

هل يعمل المهندس الكيميائى بالشهادة المهندس الكيميا فقط ؟
لا طبعا علشان المهندس الكيميائى يقدر لما يتخرج ياخد باكاريلوس علوم قسم الكيميا يعنى يدخل كلية علوم و يدرس و ياخد شهادة من كلية علوم و العكس مع علوم يقدر يكمل هندسة قسم كيميا
فى الكيميا الطالب بيدرس الجسيمات الموائع الساكنة فلو حد كمل دراسته لدراسة حركة الموائع المتحركة اللتى بداخلها جسيمات فيمكنه العمل كمهندس مدنية لتصميم خطوط الصرف الصحى او كمهندس طبية لان الدم يعتبر موائع متحركة بها جسيمات
يقدر المهندس الكيميائى كمان يوسع دراسته فى المجال النووى للعمل فى المفاعلات النووية
و ايضا يستطيع المهندس الكيميائى العمل كمهندس الكترونيات
و ده طبعا لان الطالب فى قسم كيميا باخد مواد كتير من معظم اقسام الهندسة ولكن بدون تعمق فيمكنك التعمق بتكملة الدراسات كما سبق
يعنى المهندس الكيميائى بيشتغل فى كل شئ من اول الطرشى للنووى



ماذا عن الماجستير و الدكتوراه ؟

من السهل جدا فى كيميا الحصول على الماجستير و الدكتوراه لان الكيميا مجالها واسع جدا و مازال يبقى فيها الكثير و الغير معروف